"Фрагменты прамовы закаханага" зрабілі Ралана Барта знакамітым: пасля выхаду гэтай кнігі ў свет у 1977 годзе тэарэтыка-семіёлага сталі ўспрымаць як новую поп-зорку. Яго запрашаюць на тэлешоў разам з Франсуазай Саган і Ганнай Голан (суаўтарам раманаў пра «Анжаліку»), інтэрв'ю з ім з'яўляюцца ў масавых часопісах тыпу Playboy (над якім Барт калісьці здзекаваўся ў сваёй кнізе «Міфалогіі») і Elle. Віной гэтаму поспеху - відавочная для ўсіх чытачоў блізкасць "Фрагментаў" да мастацкага твора са сваімі героямі і сюжэтам. Так кніга крытыка і тэарэтыка пра гаворкі закаханых сама становіцца прыкладам і ўзорам любоўнай гаворкі.