Аналізуючы дынаміку асноўных дэмаграфічных паказчыкаў расійскай гісторыі XX стагоддзя, вядомы французскі дэмаграф Ален Блюм не абмяжоўваецца колькаснымі канстатацыямі і прыходзіць да нетрывіяльнай высновы. Палітычныя падзеі не аказвалі на сацыяльнае жыццё насельніцтва СССР заўважнага доўгатэрміновага ўплыву. Дэмаграфічныя катастрофы першай паловы стагоддзя не змянілі яго агульную з Захадам траекторыю дэмаграфічнага развіцця, а жорсткая ўніфікацыйная палітыка не змагла пераадолець рэгіянальную разнастайнасць, якая дасталася Савецкаму Саюзу ў спадчыну ад Расійскай імперыі.