Паэт, філосаф і падарожнік Віктар Сегален (1878–1919) аказаў значны ўплыў на наша ўяўленне аб культурнай разнастайнасці. У «Эсе аб экзатызме» ён фармулюе самабытную канцэпцыю ўладкавання свету і разважае пра ўспрыманне іншасці. Адпрэчваючы турызм і каланізатарства як самыя распаўсюджаныя ў канцы XIX - пачатку XX стагоддзя спосабы ўзаемадзеяння з незападнымі цывілізацыямі і культурамі, аўтар шукае адказ на пытанне: ці магчыма па-сапраўднаму зразумець Іншага праз непасрэдны пачуццёвы досвед? Гэты свайго роду дзённік разважанняў стаў адным з першых тэкстаў, якія крытыкуюць глабалізацыю, а ідэі Сегалена ляглі ў аснову сучасных даследчых падыходаў у этналогіі.