У аснове паэтычнага светапогляду Януша Шубера ляжыць філасофія Месца, дадзенага паэту разам з сям'ёй, сябрамі і светам прыроды. Тут, у мікракосмасе Шубера, усё мае ўласнае значэнне. Пра тое, наколькі цесна аўтар звязаны са сваімі каранямі, сведчаць дзясяткі вершаў, прысвечаных традыцыям ваколіц Санока.

Іншыя гарады не адыгрываюць у творчасці Шубера істотнай ролі — яны выступаюць выключна ў якасці далёкага культурнага фону. Гэтая ўласцівасць аб'ядноўвае свет Шубера са светам Бруна Шульца. Відаць, каб мясцовая культура выжыла, у ёй павінна захоўвацца сувязь паміж пакаленнямі, біялагічная пераемнасць, якая аб'ядноўвае розныя стагоддзі.

Ідэальны чытач Шубера — чалавек удумлівы, які разумее тэкст і разбіраецца ў заблытаных чалавечых адносінах, праніклівы і добразычлівы — словам, сябар, надзелены тонкім пачуццём гумару.

Пераклад з польскай А. Векшынай, Н. Кузняцовай.