«Персеполіс» — першы графічны раман іранскай аўтаркі Маржан Сатрапі. Гэта аўтабіяграфічная гісторыя яе сталення. Драматычная гісторыя Ірана — шахскі рэжым, Ісламская рэвалюцыя, вайна з Іракам — паказана вачыма дзіцяці. Імкнучыся даць годную свецкую адукацыю сваёй свабодалюбнай дачцэ, бацькі вымушаны адправіць яе ў 14 гадоў за мяжу, у аўстрыйскі ліцэй. Захад, які так вабіў здалёк, паказвае свой будзённы твар і шакуе гераіню нетрываласцю сувязей паміж людзьмі. Пазнаўшы каханне і здраду, сяброўства і адчужанасць, амаль апусціўшыся на дно, Маржан вымушана вярнуцца назад. Але на радзіме многае змянілася. Рэжым Ісламскай рэспублікі, які становіцца ўсё больш жорсткім, сур’ёзна абмежаваў асабістыя і грамадскія свабоды. Праз некалькі гадоў Маржан зноў з’язджае з краіны, гэтым разам у Францыю, дзе застанецца жыць назаўжды.