Новы зборнік эсэ Сьюзан Сантанг «Пра жанчын», пад рэдакцыяй яе сына Дэвіда Рыфа і з прадмовай пісьменніцы і крытыка Мерве Эмрэ, уключае працы, напісаныя і выдадзеныя з 1972 па 1975 год, у адзін з самых рэзанансных перыядаў жаночага руху ў ЗША. Палітычныя і часам радыкальныя ідэі Сантанг пра тое, што значыць быць жанчынай у сучасным свеце, прадстаўлены ў крытычных эсэ, апытанні для марксісцкага іспанамоўнага часопіса, інтэрв'ю для амерыканскага выдання, а таксама ў дыскусіі з паэтэсай і феміністкай Адрыеннай Рыч.

Змешваючы жывую публіцыстыку і абагульняючую аналітыку, не заглушаючы іншыя галасы і звяртаючыся да аўдыторый іншых краін, Сантанг падымае пытанні двайнога стандарту старэння, жаночай сексуальнай валіднасці, адносін жанчын адна да адной, сувязяў жаночага руху з іншымі рэвалюцыйнымі рухамі, самаўціскання жанчын, функцыянавання ідэалаў прыгажосці, эратызацыі фашызму, плюральнасці фемінісцкіх пазіцый і іншыя.

Зборнік адлюстроўвае бурную — і ўжо гістарычную для нас — эпоху пачатку 1970-х гадоў, а таксама шлях самой Сантанг, не губляючы крытычнай актуальнасці і па сённяшні дзень.