У кнізе ўпершыню праведзена даследаванне сучаснай польскай рэцэпцыі Ф. М. Дастаеўскага шляхам аналізу матэрыялаў штодзённіка „Gazeta Wyborcza” за 1989–2019 гг. З больш чым 1200 газетных публікацый удалося стварыць панарамную карціну адлюстравання пісьменніка ў польскай культуры. Аўтар прасочвае рэцэпцыю біяграфічнага наратыву Дастаеўскага, яго мастацкай творчасці, публіцыстыкі, перапіскі; прадстаўляе кампаратывісцкія літаратурныя і культурныя сувязі; зазірае на тэатральныя сцэны і ў кінатэатры; адсочвае прысутнасць пісьменніцкай спадчыны ў адукацыйным працэсе Польшчы, гісторыі, палітыцы, грамадскім жыцці, масавай і элітарнай культуры; разглядае яго ў нечаканых кантэкстах. Асобна звернута ўвага на прадстаўлены праз рэцэпцыю ў газеце ідэйны свет Дастаеўскага: хрыстацэнтрызм і антрапацэнтрызм, жаночае пытанне, шавінізм, "польскае пытанне", "усходняе пытанне" і г.д. Даследаванне можа быць цікава вучоным-гуманітарыям, а таксама кожнаму, хто захоплены творчасцю Ф. М. Дастаеўскага, польскай, рускай і сусветнай культурай.