6 жніўня 1945 года ўпершыню ў гісторыі чалавецтва была прыменена ядзерная зброя: амерыканскі бамбавік «Энола Гэй» скінуў атамную бомбу на Хірасіму. Больш за сто тысяч чалавек загінулі, сотні тысяч атрымалі калецтвы і прамянёвую хваробу. Праз год часопіс The New Yorker адвёў цэлы нумар пад рэпартаж Джона Херсі, які прасачыў, што было з шасцю выжыўшымі да, у момант і пасля выбуху. Выдадзены ў выглядзе кнігі рэпартаж разышоўся тыражом звыш трох мільёнаў экзэмпляраў і шматразова прызнаваўся лепшым узорам амерыканскай журналістыкі XX стагоддзя. У 1985 годзе Херсі напісаў артыкул, які стаў пятым раздзелам «Хірасімы»: у ім ён распавёў, як далей склаліся лёсы шасці галоўных герояў яго кнігі. З бясконцай уважлівасцю да дэталяў і фактаў Херсі апісвае ўвасабленне начнога кашмару некалькіх пакаленняў - кашмару, які не перастаў нам сніцца.