Амерыканская паэтэса Эмілі Дыкінсан да гэтага часу застаецца загадкай. Яна нарадзілася ў 1830 годзе і памерла праз 55 гадоў у тым жа доме. Ніколі не была замужам і не мела дзяцей. Напісала больш за тысячу вершаў, з якіх пры жыцці апублікавала менш за дзясятак. Амаль не пакідала родны горад Амхерст.

«Гарады на паперы» — яркі літаратурны партрэт пісьменніцы, якая была здольная ствараць цэлыя светы, не выходзячы з уласнага саду. Спалучаючы біяграфічныя звесткі з уласнымі фантазіямі, Дамінік Форцье стварыла глыбокае і тонкае апавяданне пра свабоду ўяўлення і прыроду творчасці, пра месцы, у якіх мы жывём і якія жывуць унутры нас.

Дамінік Форцье — пісьменніца і перакладчыца, нарадзілася ў Квебеку ў 1972 годзе. Яна абараніла дысертацыю па французскай літаратуры ў Універсітэце Макгіла і працавала ў розных выдавецтвах. Аўтар пяці раманаў, лаўрэат французскай прэміі Gens de mer (Прэмія маракоў) і Прэміі генерал-губернатара, вышэйшай літаратурнай прэміі Канады. Кніга «Гарады на паперы» ўдастоена прэстыжнай прэміі Рэнода за эсэ (2020).

У афармленні выкарыстаны гербарый, сабраны Эмілі Дыкінсан.