«Змрок чалавецтва. Абуджэнне сэрца» - другая частка нямецкамоўнай паэтычнай анталогіі ХХ стагоддзя.

Анталогія Курта Пінтуса, якая стала класічнай, упершыню была апублікавана ў 1919 годзе ў выдавецтве Эрнста Ровольта. Шасцёра з 23 аўтараў анталогіі не дажылі да выхаду кнігі ў свет. Чацвёра загінулі на Першай сусветнай вайне.

Сімфонія найноўшай паэзіі, складзеная Пінтусам, аказалася настолькі папулярнай, што перавыдавалася ў Германіі некалькі дзесяткаў разоў, што, зрэшты, не выратавала кнігу ад уключэння ў спісы выданняў, якія падлягаюць спаленню.