Ян Т. Грос (нар. 1947) — гісторык, які адыграў значную ролю ў распачатай у другой палове 1980-х гадоў і яшчэ не завершанай грамадскай дыскусіі аб ролі палякаў у знішчэнні яўрэйскага насельніцтва Польшчы падчас Халакосту. Грос першым абнародаваў гістарычныя факты аб масавым знішчэнні палякамі яўрэяў.

Пасля публікацыі ў 2000 годзе яго кнігі «Суседзі» аб падзеях у Едвабне было распачата расследаванне, і ў 2002 годзе прэзідэнт Польшчы Аляксандр Квасьнеўскі прынёс афіцыйныя выбачэнні яўрэйскаму народу.

Публікуемая кніга размоў — гэта не толькі вяртанне да балючых тэм, але і цікавая біяграфія гісторыка на фоне гісторыі. Інтэрв'ю-рака асвятляе ўвесь жыццёвы шлях Гроса, неразрыўна звязаны з драматычнымі падзеямі ў Польшчы другой паловы XX стагоддзя: моладзевая апазіцыя, 1968 год, эміграцыя, заняткі гісторыяй Халакосту і гісторыя напісання кніг, якія ўзрушваюць грамадскую свядомасць.