Раман Антоніа Орландо Радрыгеса — выдуманая біяграфія кубінскай ліліпуткі Эспірыдыёны Сенды (1869–1945), больш вядомай як Чыкіта (Малышка). У канцы XIX стагоддзя яна прыехала ў Нью-Ёрк, каб заваяваць славу танцоўшчыцы і спявачкі. І ёй сапраўды ўдалося стаць адной з самых высокааплатных знакамітасцяў свайго часу.

Вытанчаны, поўны дасціпных паваротаў сюжэта раман прадстаўляе і падрабязную карціну эпохі, шчодрай на грамадскія хваляванні і тэхналагічныя цуды; эпохі, калі так званыя «памылкі прыроды» выклікалі жывейшую цікавасць.

Антоніа Орландо Радрыгес (нар. 1956) — адзін з вядучых сучасных лацінаамерыканскіх пісьменнікаў, крытык і журналіст. Нарадзіўся на Кубе, вывучаў журналістыку ў Гаванскім універсітэце, з 1999 года жыве і працуе ў ЗША. Вядомасць яму прынеслі кнігі для дзяцей і падлеткаў.

У 2008 годзе Радрыгес стаў лаўрэатам прэміі «Альфагуара» — самай прэстыжнай літаратурнай узнагароды іспанскамоўнага свету. Журы, якое прысудзіла раману «Чыкіта» прэмію, выбраўшы яго з 500 тэкстаў, адгукнулася пра яго так: «Гэта твор, напоўнены біццём жыцця. Аўтарскае апавяданне адрозніваецца стылістычным майстэрствам і нястомнай фантазіяй. Перад чытачом, нібы бездакорна выкананы канцэрт, разыгрываецца гісторыя дзівоснага персанажа».