У кнізе "На вайне выжываюць толькі кактусы" сабраны кароткія нататкі, запісаныя аўтарам у Бучы і ў Кіеве, пачынаючы з лютага 2022 года.

«... Першы разрыў вайны. Ты яшчэ не зразумеў, не сцяміў, што гэта такое - вайна. Табе яшчэ здаецца, што гэтая лакальная падзея, якая застыне ў гісторыі, ва ўласнай памяці нейкім яркім эпізодам, пра які можна будзе ўспомніць пасля як пра трагікамічны кур'ёз. Ты яшчэ не ведаеш, што менавіта ў гэты момант твой свет разляцеўся на тысячы бясформенных, пачварных аскепкаў. Свет чалавека перастае быць суцэльнай уласнай гісторыяй і рассыпаецца на эпізоды - часам няскладныя, выпадковыя - у якіх часта губляюцца ранейшыя сябры, знаёмыя, але з'яўляюцца новыя цені новай рэальнасці.

...Нажаль, у мяне ёсць такія ўспаміны, якімі я, мусіць, ніколі не падзялюся, але гэтыя цыдулкі, зробленыя па памяці, хай застануцца са мной. Тут горад Буча пад Кіевам, пад абстрэламі».

У афармленні кнігі скарыстаны фатаграфіі, зробленыя аўтарам. На вокладцы - след на асфальце ад разрыву міны.