Густаў Герлінг-Грудзіньскі (1919–2000) — польскі пісьменнік і журналіст, значная фігура польскай літаратурнай эміграцыі XX стагоддзя. У 1940 годзе ў Львове ён быў арыштаваны НКУС і абвінавачаны ў шпіянажы. Два гады правёў у лагеры ў Ерцаве (Архангельская вобл.).

«Іншы свет» — першая ў свеце кніга, якая распавяла праўду аб існаванні ў СССР злачыннай сістэмы канцэнтрацыйных лагераў. Гэта дакументальная проза пра жорсткія метады «перакоўкі асобы», якія ператваралі людзей у лагерны пыл. Кніга была напісана ў Англіі ў 1950 годзе і спачатку выйшла ў англійскім перакладзе з прадмовай Бертрана Расела ў 1951 годзе. Яна была перакладзена на мноства моў.

Польскі арыгінал убачыў свет у 1953 годзе ў Лондане і толькі ў 1989 годзе ў Варшаве. Упершыню на рускай мове кніга была надрукавана ў лонданскім выдавецтве OPI ў 1989 годзе ў перакладзе Наталлі Горбанеўскай.