Разбітая вайной і асабістымі абставінамі, у пэўным сэнсе адмененая рэальнасць складаецца Аляксандрам Ільічэўскім з аскепкаў тэкстаў розных жанраў. Літаратура як інструмент асэнсавання рэчаіснасці правяраецца на трываласць, на магчымасць у прынцыпе адлюстраваць трагічны стан свету.

Аўтара жанравае становішча кнігі цікавіць менш, чым свабоднае складанне гісторый, здольных быць больш праўдзівымі за жыццё. Новыя спосабы выражэння сэнсу, якія размываюць класічны спектр жанраў, — тое, што стварае Ільічэўскі з дапамогай астэроіднага пояса запісаў, накідаў, гісторый.