«Хрома» — разважанні аб каляровай разнастайнасці знакамітага брытанскага рэжысёра і мастака Дэрэка Джармена (1942–1994). У гэтай кнізе, напісанай у 1993 годзе, за год да смерці, Джармен, які губляе зрок, выкарыстоўвае ўсе рэсурсы пісьма ў спробе перадаць складаны і няўлоўны аспект прадмета, у адносінах да якога ў яго назапасіўся досвед цэлага жыцця.

У сваім характэрным стылі — лірычным злучэнні класічнай тэорыі, анекдатычнасці і паэзіі — Джармен праводзіць чытача праз каляровы спектр, прадстаўляючы кожны колер увасабленнем эмоцый, абуджаючы ўспаміны і сны. Ён тлумачыць выкарыстанне колеру ў выяўленчым мастацтве — ад сярэднявечча да Рэнесансу і мадэрністаў, звяртаецца да вялікіх тэарэтыкаў колеру — ад Плінія Старэйшага да Леанарда. Джармен таксама піша аб значэнні колеру ў літаратуры, навуцы, філасофіі, псіхалогіі, рэлігіі і алхіміі.