Натан Шчаранскі нарадзіўся ў 1948 годзе ў Сталіне, цяпер Данецк, Украіна. Быў удзельнікам праваабарончага руху ў СССР і адным з лідэраў барацьбы за права савецкіх яўрэяў рэпатрыявацца ў Ізраіль. У 1976 Шчаранскі стаў адным з заснавальнікаў групы па выкананні Хельсінкскіх пагадненняў, якая адсочвала парушэнні гэтых пагадненняў у тым ліку і ў адносінах да розных рэлігійных і нацыянальных груп у Савецкім Саюзе. У 1977 годзе арыштаваны па абвінавачанні ў здрадзе радзіме і ў шпіянажы. Пасля дзевяці гадоў зняволення вызвалены 11 лютага 1986 года. 1996-2005 - міністр і намеснік прэм'ер-міністра чатырох ізраільскіх урадаў.

Аляксей Навальны: «Я рэальна не ўяўляю, як ён выжыў… Чытаючы ягоную кнігу, я часам трасу галавой, каб пазбавіцца ад адчування, што я чытаю сваю асабістую справу. Напрыклад: будынак ШІЗА/ПКТ — асобны барак за калючым дротам. Максімальны тэрмін у ШІЗА - 15 сутак. І я не здзівіўся, калі пасля некалькіх „пятнашак“ запар мяне як злоснага парушальніка перавялі ў ПКТ на паўгода. Адзін у адзін».